魚子醬玩樂手記 - PMQ 傳統手藝年宵 CNY Mini Bazaar - 吹糖藝術、撕紙、剪影。最佳親子節目~!

每年魚子爸在農曆新年都會忙得喘不過氣，如果有一天你認得商場、酒店、屋苑的醒獅活動內有一個很相似的童顏男士，應該多半是魚子爸 XD 這年趁著真正的假期，一家三口出動，來到PMQ小型的CNY Mini Bazaar，雖然攤檔少少，卻充滿歡樂和驚歎，大家也敬業樂業

新年前大手買入四套親子裝，其實是為Studio拍照用，所以暫時還未有勇氣一家三口齊齊著 XD 兩個兩個還是可以的~haha~這天就第一次以親子裝出動，效果不錯吧 =P 衣櫃內還是離不開黑黑黑黑白黑黑黑黑黑白 

走上來的時候只是丁點雨粉，沒想到才剛踏返PMQ就一直維持大雨，幸好這邊都是全蓋式的活動空間；每次大時大節，最壯觀的都是中庭的藝術裝置，這次有比利時設計師 Charles Kaisin 以13500隻金色紙馬，組合成超巨型的「金羊」，超有氣勢 

Merr Merr Bike Around 讓大家有機會圍住桃花「行大運」，雖然今天是周日，但可能因為大家在新年都沒有weekend concept，而且天天紅日，所以遊人不算多，不用排隊就可直接加入下一Round的桃花團 XD 雙人單車都改裝成呔盤，而中間的座位特別留給小朋友，有安全帶也有腳踏，超超超貼心的家庭單車；其中一架單車維修中，所以負責的哥哥就要當人力車，帶動大家轉轉轉，大約走了三四圈，原來踩都幾辛苦，推的應該更吃力  

吹糖手藝，唔知大家有無這樣的童年回憶，以前在家樓下，就有一個伯伯做這些超精緻的動物，栩栩如生，一班小朋友最愛玩「吹波波」，就是趁著糖膠還熱的時候，迅速接過手吹吹吹，若然大過櫃面的圈圈就有大獎，愈大個波波就可以得到愈大的糖膠動物 

 所以當我們走近的時候，魚子媽都要尖叫了~! 至少十多年無遇過，色澤多了，但呀姨的手藝不及當年伯伯般精細，但最重要是依然有吹糖波玩~! 從前可能2,3蚊，來到PMQ這裡就$10，不捨得多玩幾次

$10 一次，還可自選顏色，要了粉紅色 [原來是西瓜味!] 爸爸從沒看過這類糖膠公仔，所以沒有共鳴，一於獨樂樂~! 

和小時候一樣，還不及手心大就爆了，手指唔小心摸到 >_< 一爆了，也迅間冷卻硬了定型，噢~~~這數十年來都得不到大獎，但$10 又唔捨得玩多次，好彩吹得唔大，都會有安慰獎 

魚子醬同樣選了粉紅色的棒棒糖作安慰獎，爸爸一邊用奇異目光質疑糖膠味道，其實都不知幾好味~! 如果唔好食~就唔會興奮到尖叫啦 ~~~~

失敗過後都總算有得玩有得食，我覺得互動過程和緊張程度仲好過食出奇蛋啦 

另一樣懷舊小食「糖蔥餅」其實依家都成日見到，家附近都還有小販，平時$3件，在這邊要$10，但看到師傅的手勢唔錯，用料都好足，所以也決定湊熱鬧吃一件  

平時多見白砂糖、椰絲、花生碎，這裡都加入了黑芝麻，視覺效果好之餘，都香口好多 

魚子醬第一次接觸這薄餅，超新奇，但為左整潔程度，最後爸爸都係決定餵食比較理想，費事成地都係糖 XD 

吹糖波、糖蔥餅，最後當然少不了飛機欖，沒有了欖形鐵箱，總有點失色。其實同場還有花花形的即製棉花糖 [情人節和聖誕節時超受歡迎]

 說完吃的，手工藝的三個攤檔有 香港摺友會 教大家摺羊羊，小朋友們都好專心啊，而且見到成品都好靚好Details 

來這裡最想一睹 敏叔的撕紙藝術，真係撕乜似乜，無論係單字又或者動物/卡通人物都難唔到敏叔，但排隊就要多多耐性，大約排了10個人左右，也用了近個半鐘 

雖然時間耐，但一邊欣賞敏叔的手藝和他的作品集，就覺得真係好勢利! 甚至前面有人show 手機的寵物相，敏叔邊看邊撕，三兩下手勢就撕出超神似的狗仔!!! 

健談、開朗、三文兩語都難唔到敏叔，而且手指累了還會吹笛跟大家拜下年，真係無得頂~! 邊排隊看見他閒時就食塊餅、食個包其實有d慘，見佢望到有掃地呀姐拎住杯熱奶茶吞晒口水，真係好想買碗麵買杯奶茶比佢，好彩到我們撕ge時候就有排前幾個ge 人買野飲黎~太窩心了!! 原來大家都覺得敏叔口渴了 

Mini Bazaar 由2pm一直到8pm，而且這兩天陰陰涼涼又要用神，大家如果有機會去的話，買d野比敏叔濕下口，買d生果都好，食包包餅餅好乾 

5,6點後一直大雨，所以人流驟減人龍不再，大家想參與剪影又或者撕紙的話，都不用排大耐 

因為撕紙跟剪影同一時間排到魚子醬一家，所以幫唔到對方影相，反而要東奔西跑交換位，剪影的效果大家覺得如何??  都幾神似，而且這幾個攤位通通都是免費的，志在分享手藝，大家應該更加珍惜這些傳統手藝 

臨行前在GP Photo Booth 影了幾張搗蛋合照，好開心啊~!! 不過太大雨的關係，最後也要狼狽截 的士 下山去~~

都是魚子媽的錯，人人都一紙一字，我們就想一紙兩字，所以字型比例不夠位，個「桓」字都有少少考起敏叔，接手後覺得似個「宜」字，最後動手「加工」撕多2下，對唔住呀敏叔 ^_^;; 但加工完真係似 d，我一定會鑲起你ge作品，避免陽光照到而脫色 

PMQ 這個民藝年宵 Mini Bazaar 除了初三初四，下周初十及初十一 [28 Feb & 1 Mar] 1400-2000仍然有舉行，大家不妨帶小朋友感受一下民間傳統手藝，難得在中環可以一次過感受到，實屬難得~! 佔地雖小，但連排隊計也足以消磨2,3小時，再走走上面的店舖，一整個下午的親子節目來的啊~~~