魚子醬玩樂手記 - 黃金海岸 Easter Dinoland 充氣嘉年華。盡興燒豬記!

復活節前已經好期待黃金海岸的充氣嘉年華，因為去年同一時間在九龍城廣場的嘉年華，只有歲半之齡的魚子醬只玩到部份遊戲，最壯觀的小丑魚奇幻漂流大滑梯玩唔到；今年兩歲半，高度總算剛剛好玩到所有遊戲，而且他的大肌肉早已等同三四歲小朋友，膽子也超大，一定會玩得盡興~

好多謝公關姐姐的安排，可以黎到屋企附近大玩特玩，行裝都唔洗帶咁多 =] 復活節的天氣真係好到無得頂，而且陽光超級刺熱，辛苦了這裡工作的哥哥姐姐，風扇、退熱貼、毛巾少不了，連我們只玩了幾個鐘都已經曬到變燒豬了，要不停搽after-sun 蘆薈先力保不失 

超級期待的變色龍世界 [適合90-140cm]，眼見雖然作為場內最細的小朋友，不過都完全沒有半點擔心佢會唔敢玩，見佢玩左一次之後，行返去入口搵爸爸同工作人員姐姐投訴，原來係話「唔玩呀~好熱呀個滑梯」=o= 確實呢d膠質ge設施曬後會焫親 PatPat，之後姐姐就同佢係旁邊跳跳跳，難為媽媽在上層一路諗「姐姐姐姐~無時間ga啦~得幾分鐘~你仲同佢係度跳」之後玩多一次就已經夠鐘lu~~~~所以只係玩左2次~唉呀呀~

之後一家三口來到上層的玩樂區，呢度風景一流，先來「考古奇兵」，用上我們都愛玩的Kinetic Sand造型流沙，這次仲摻了不少恐龍骨在裡頭，小朋友可以用工具掘出來

未知是否暴曬之下，流沙好似比平時更重更難推開，不過我們倒非常享受係呢個環境玩沙  

魚子醬到了認真觀察學習的年紀，真係見佢會先用工具，掘到差不多就用手指執，然後拿上手慢慢望，再問我們是甚麼來的 

恐龍遊樂園 [適合90-120cm]，不過好似無乜人幫襯，因為實在超級非常勁之暴曬，連哥哥姐姐聽到我地想玩，都話「不如你地試下先啦~真係好熱~你地玩到先收飛」 

玩變色龍投訴太熱的魚子醬，來到這裡又玩得暢快，而且「包場」爽YY，哈哈，可以因為只係用腳跳跳跳，唔洗手腳Pat並用，無投訴~Good~! 呢個去年的限制是80cm，所以我地都有得玩，不過當時的魚子醬，站在一旁warm up都已經站到夠鐘了XD 

上層最幸福的工作人員，應該是帳幕下的小攤位，扔公仔同神搶手都完全難唔到魚子醬一家! 

我要做騎師 [適合90-130cm] 影相一流的慢版活動，唔好意思鄉下佬上身「著襪著涼鞋」因為樓下d充氣設施全部都要著襪，所以著住先 XXXXXDDD 呢個馬仔的玩法好容易掌握，就是用腳上下上下踩動腳踏，不過對小朋友來說，可能跟他說「用patpat跳坐跳坐」可能更易明白 

呢度ge環境真係好適合辦充氣嘉年華，又唔會令商場顯得特別逼，又有效增加人流，餐廳生意good good good [無左weekend market之後，黃金海岸一直少了個景點] 

去年敗走的We嘩!抓抓樂 [適合90-140cm]，魚子醬一閂門已經喊到要走

今年完全是超級非常勁勁享受，而且仲同我地講「裡面好舒服，好大風」orz ，反而有幾次同佢一齊入內的哥哥姐姐，都驚到玩唔到，所以工作人員入場前講明「好多小朋友會喊，但無得退票」，而魚子醬係少數係入面自由自在的小朋友，姐姐都話「嘩佢咁大膽ge」XD

這張是 Best Pick of the Day，由心發生的笑容啊~ 

反轉夢幻堡壘 [適合90-120cm] 只係簡單彈床，不過都係因為較陰涼的關係，都幾受家長歡迎；這天大部份遊戲都係排一輪就有得玩，除左變色龍同兩個水上遊戲就可能要曬一陣 

Easter Dinoland的遊戲主要分佈三個區域，包括商場中間的大廣場、平台，仲有連接酒店沙灘通道的小廣場，兩個水上遊戲就集中左係呢度。魚子醬一家最期待 We嘩!水上飄 [適合90cm以上]，因為可以親子檔上場~yeah~~~~~

先係父子檔，好似玩緊碰碰船，其實無乜點郁過，但會不停自轉 XD，然後不停見到有人跌低，轉轉轉，又跌過 

終於飄到黎池邊，第一時間拉住黎影相，好好玩咁bor~~~~ 

玩完第一次又即刻排隊玩第二次，魚子媽上場了~~~不過論盡d意外頗生d~原來真係要勞動架~~出曬汗 XD 不過呢個作為唯一一個唔洗著襪ge遊戲，而大家ge臉同腳都會不停貼住個滾桶，玩完記住洗臉呀 XXD 但真係好想不停Encore 

超級盡興的半天，真係曬到黑左，但每次睇返d相都勁回味，其實同期係奧海城仲有另一個充氣嘉年華，不過玩完要抖返幾日，休戰一回，我地始終係屬於陽光與海灘的YamaBabies，曬下無所謂啦 =] 今日同超像真暴龍BB無緣，據聞扮恐龍ge哥哥中暑了，希望哥哥無事啦~~真係超熱呀~~辛苦曬辛苦曬~夠高玩，超盡興，非常期待下次的嘉年華~!

相關文章:

[復活節親子好去處] 魚子醬玩樂手記 - We嘩充氣嘉年華 2014 。玩盡九龍城廣場!

參考連結:

We嘩!充氣嘉年華 Official Site

We嘩!充氣嘉年華 Facebook Page