【親子好去處】消防局開放日。有策略排隊好重要！

消防局開放日都要講策略？魚子醬一家可以肯定話比大家聽，如果無策略的話，好快就會被人龍打沉士氣，係咁嗌走.... 因為呢個情況已經發生過係我地身上，今年唔可以再咁氣餒。魚子媽好憎排隊，今次開放日將一整年的耐性Quota都曬冷啦！務求魚子醬玩得開心

屯門消防局開放日在上周日，往後這幾個星期都陸續有其他分局開放，大家會去的話可以參考一下我們的排隊策略 

開放時間1030開始，其實本身預計0945-1000就到，不過星期日剛起床的速度，呀下~大家都估到理想同現實有點距離，我們到達時已經1020，人龍繞了消防局1/4圈，再望轉頭ge時候，人龍已經不見尾。彷佛全個屯門同唔係屯門ge小朋友都一下子聚集在這裡 

如果之前未來過的話，很可能會迷失了，唔知應該玩咩先。其實最值得、機會最難得、最有滿足感，一定係小朋友著消防員制服影相，所以，一入內就記得要派爸爸/媽媽排影相隊，否則一下子就會變成縱橫交錯都是人龍，唔知邊條打邊條

因為黎親ge都係一家大細，都唔會話介意玩到就排到先插返幾個入隊 [因為大家都好明白排隊苦況]，魚子爸負責排影相隊ge時候，我地就趁時間尚早，到位置較偏，未有太多人發現的救護/消防電單車拍照留念，雖然覺得消防紅色一架比較有型，但時間有限，只能二選一，就同救護員叔叔影相啦 ^o^ 好型啊~!

兩架電單車之間，還有佈景板可以影相，不過人流就真係無幾個XD 因為吸引ge野太多，呢d可以留返遲d先都得 

大家可以在消防局不同角落看到開曬閘門的泵車、細搶，一睹消防員日常使用的工具和裝備，亦有消防員會駐守在車旁邊跟大家講解不同的用具

雖然好多都要估估下，不過消防喉大家一定識啦掛！有機會摸下都已經好開心啦！ 

仲可以係泵車前影返幅霸氣相片 XD 

紀律部隊係控制人群真係有一手，好有條理，人龍消化得快，我們排了半小時左右已經到我地影相啦 ^o^ 因為數數埋埋有近8件小小制服，雖然Free Size，但基本上2,3歲ge小朋友都已經著到，大至6,7歲都無問題仲更fit size，消防帽各樣都唔會戴到左跌右跌，細心考慮過size可調較

全局消防員都好好人，大家都好投入這場開放日，笑容可加，要集郵都永無say no~讚呀！ 

影相用的 pops~應該都係消防員係局唔洗出動ge時候整的 [因為d邊位好粗糙，自已cut的 XD]，話時話又幾鬼像真 

Backdrop係屯門消防局的正門，但將全局的車種大曬冷！好正啊~ 

消防員哥哥好主動幫每家人影相，覺得大家都真係enjoy呢一日，唔係「打份工jeee」 

消防員講解用具ge時候，有時都會遇到d奇怪問題，好似有個氧氣面罩，有個媽媽問「咁呢舊野唔會洗架？咪好臭囉？」哥哥話「咦我又無諗過呢個問題wo~亦無諗過走去聞下」hahahahhaah~之後個媽媽真係拎起黎大力索 「嘩好臭」 XD 魚子醬一家企係側邊真係忍笑忍得好辛苦，哥哥都微笑帶過就算~hahahahaha 

消防局同救護站一齊，所以救護車當然都有開放比大家參觀，有個爸爸離遠話「嘩，白車都爭住排隊上，大吉利是」XD 其實又真係唔希望平時有機會坐，一於參觀下

因為消防車無得上車參觀，救護車成為左「最OPEN」的環節，人龍原本都好長，但因為中途會有消防示範表演，封晒場，大家睇完救火表演，一解封就衝返去排排排，魚子醬兩母子都好本能咁把握呢個機會衝埋一份，所以好快就上到車 [之前望埋去條隊真係長到唔想排] 聽到前前後後有d家庭係表演前明明就排到，點知要清場，依家又要重新排過，我地真係算好好彩

上到白車，魚子醬擺出一副真係要上白車ge樣 =o= 整個車廂簡單不過，確保行車時的安全，都唔會有物件放係Bench，不過就可以睇到有Lock擔架床的位置之外，同行者座位4個，然後前頭還有一個救護員的主席位 =P

急救儀器都有展示，但因為無開機無人講解，所以大家都有點新奇之後就開始「呀~~~~~~無啦？」 咁囉 XD

相信救護員叔叔一定覺得救人易過控制成班小朋友湧入車頭 XD d制愈唔比按，d小朋友就愈想試下邊個有Bi Bo Bi Bo Bi Bo，搞到叔叔踢晒腳，係咁話「嘩你睇下~望鏡頭~後面後面~望後面影相啦」hahahahahah 

魚子醬同媽媽去左參觀救護車，爸爸呢？ 爸爸又去左排隊囉 XD d波波真係消防員扭ga~~做消防員真係唔易~連氣球都要識扭~~本來一開門係有蜻蜓扭架~不過可能太花時間，所以之後個d都主要扭花花、劍，而魚子醬就要求一把槍，消防員叔叔有求必應~! 咪以為排個波好簡單~~爸爸足足排左一個鐘~~~~~~~~結果個氣球係離開消防局30min左右就玩爆左 XD 可能爸爸「眼淚在心裡流」~~~WAKAKAKA  

當日仲有三幾個攤位遊戲，不過呢d攤位就係由民政處負責的，小禮物都只係一d小文具，得少少少部份同消防有關，大獎是吹氣的大消防斧頭，其實大人玩唔難拎，不過魚子媽技術有限，都係拎唔到大獎，魚子醬竟然揀左個消防車髮夾=o=

 往年都無留意，原來係有咁多紀念品賣，不過大部份都好似~唔~~o岩上一輩多d~唔~~~

係近入口的位置，仲見到好壯觀的BB車陣，建議大家都係盡量唔好帶車，真係會好多人，排隊、穿梭人龍間都唔方便 

其實早上排隊ge時候都有一兩陣過雲雨，但之後全日都藍天白雲，真係天公造美 

消防局，明年再會！ 希望 魚子醬鐵人家族 小小的分享幫到大家，不過畢竟每個局的安排可能都有d差異，大家盡自已能力，分散人手，滿足小朋友參與最多，已經係大成功！

相關文章:

魚子醬周末遊蹤 - 屯門消防局開放日2013