尖沙咀 - 隆濤院 - 世間上「任食」就等於漏單?

與一班好朋友在周日又來一聚，我們不需午時三刻日日見，但至少大家都是真心視大家為好友，是日的主題是魚子醬百日宴+ 一月之星慶祝 + 團年飯，是但啦，總之就個個都係主角，即係AA制囉，哈哈。選址在1881 Hullett House的隆濤院來個點心任吃午餐，盛為$230+10% [weekday $190+10%]

我得承認我從未上過Hullett House，基本上連地面那個經常因節慶而改變的裝飾區我都無行過入去無影過，縱使路過數百次。結果這次推住B車要上去才發覺自已會迷路，指示極不清晰之餘，明顯照顧不到傷殘/推車人士；升降機只去到商場2樓，但眼見連接酒店卻只有電梯，而且梯級很短，推著BB車上電梯已經有d危，如果是老人家要坐輪椅豈不是不能光顧? [可能有隱藏lift直上酒店? 可能啦...但這裡是古跡，我不覺得會有，總之就不方便，就算有，指示也極不清晰]

終於上到平台花園，完全沒有隆濤院的指示牌，左邊花園的是Stables Grill，面前是The Parlour自助餐，但Recep一個員工都沒有，等了良久終於有waiter走出來才問到，

指著旁邊的小巷說只有這路直入就到，但途中要上幾級又落幾級，唉!好彩魚子爸在，否則都唔知點算 [我問左2次係咪推車都得呢條路，佢答我係，結果離開時我們才發覺在Stables Grill那邊花園根本平地直通入來隆濤院!! 激死我] 入到內園，隆濤院Recep又係長期無人，但這裡不是開放式，而是有兩個不同的房間做成偏廳，當然門前又要跨一級才到，沒有Recep又要自已入內左望右望找朋友，找到後才叫魚子爸搬車入內，未食都已經出晒汗!

這裡的燈光較暗，主要用射燈營造環境，靠窗的位置很不錯，但偏偏是因為只有一個出入口兼多間隔，空氣極不流通，一出一入就會發覺這裡很焗很熱，雖然檯與檯的距離遠，但都幾應聲；缺點未吃一籮籮，還是說回吃的了，有讚有彈，入正題: 

這裡用點心紙任剔，好似食壽司，寫1就1粒蝦餃咁；這個下了Rose Champagne的香檳蝦餃，顏色較一般的紅潤，也相當飽滿，至少外皮有彈性不糊口，過關

這個金絲燒鵝酥朋友說是名物，確實在賣相方面顯得製作不簡單也花過功夫，外層就像芋角，而裡面就是mix了鵝肉、豬肉的薯蓉，賣相加分，味道個人認為一般 

這個菠蘿叉燒餐包是我全餐最滿意的食品，外層油酥皮不突出，但裡面除了叉燒竟然有菠蘿肉，味道濃得來又匹配，這個我想Encore 

眼前的景象彷似飲宴尾段，媽媽愛心湯好得，湯料都多；菜甫肉粒炒飯銷情一般，但我覺得乾身很好吃，吃了一碗半 

三文魚春卷是個簡單卻少見的點心組合，整體味道沒驚喜，亮點可能是中間的wasabi 

繼續是卷物，竹笙上素腐皮卷與皮蛋蝦筒。 以前好鍾意食皮蛋，但唔知點知點解聽得多Thousand Year Egg呢個名之後，感覺怪怪的，依家有少少避吃，哈哈。但論特別當然後者特別，面層的芝麻很香，但再香都不及裡面的酸薑皮蛋搶鏡，蝦膠已成配角

陳皮生竹牛肉球無端端包成福袋但一d都唔好食唔該 

生煎包無試，不過睇賣相都應該一般般 

蛋撻又是敗筆，不提也罷

蛋散又說是名物，糖漿另上，但不是特別糖漿，只是西多個d，蛋散少了份蛋香，顏色慘白，質感鬆脆是真，但齋吃無味，加糖漿又甜到爆，我寧願要返平時沾蛋炸再有糖coating個d 

香麻炸薯棗太甜太漏，趁熱還好，放涼後就真係幾頂下 

奶皇包一看就知敗筆，成隻咸蛋咁實骨骨 

上菜上到好似飲宴執檯咁，仲有無數未出的點心相，腸粉類是不錯，一般茶樓有的排骨鳳爪呢度都有，自行定奪。不過最不滿的是，世間上是否所有「放題」都興漏單架呢? 我地寫蛋散寫左一次要七、一次要三，但最後只來了三，到話last order時追返呢個，佢只黎多4話預我地一人一個，fine~~但最想食的菲林卷無黎，仲有幾個點心無黎過/寫幾次先黎一次 

另一缺點就是這裡的佈局問題，礙於保留原設計，廚房在庭園的其中一房，所有點心出菜都要開門，行戶外走廊，再開門入房上菜，溫度是一問題，衛生是一問題，我不喜歡

我係咪好似講到好差? 有時有d地方就係咁，配套差，水準一般，環境ok，結果還是會來，眼見有大量一家大細，話晒任點任吃，不用遷就誰，隆濤院，只是一個這樣的地方。

地址: 尖沙咀廣東道2A 1881 Hullett House 

電話: 3988 0107

**如想得到更多實時飲食旅遊資訊，不妨LIKE一下我的Facebook Page =]