鐵人家族的生活原則

=================================
鐵人家族的生活,就是在藍天白雲的時候「及時行樂」,
讓大自然成為孩子的導師所以天晴的時間,文章更新速度會慢慢慢慢慢慢慢,因為我們都往外跑了!下雨天就是博客更新得最頻密的日子
我們的文章都是有血有汗的真實分享,請尊重版權,要轉載請標明出處,謝謝。
=================================

7/07/2016

【親子好去處】期間限定 香港科學館專題展覽「古怪動物園」

回港後馬不停蹄,繼續玩,反正返多幾日學都放暑假,大家嘅Holiday Mood已經非常濃烈 XD 回來後第一件事係走入科學館看看最新專題展覽 - 「古怪動物園」! 因為旅行關係,事前也沒有特別做功課,魚子醬也問「裡面會有啲咩動物?」其實無真動物,反而是窺探動物界一啲奇怪又或者噁心嘅習性及行為,應該話係比較冷門嘅話題,即管去睇睇!

科學館全新兒童天地2017先重新開放,而一啲深受小朋友歡迎展品如『圈圈雲』已搬到地下展廳;「古怪動物園」亦喺呢層。

七一首度開放,聽朋友講周末好多人,但我地星期一來,情況就好得多,每組設施唔駛勁排隊,輕鬆輕鬆 

全個展覽共16組互動展品,大部份也是簡單易明,三歲細路都睇得明種。「盲頭烏蠅」係入場後最先接觸到嘅展品,認真,睇完展覽後先知烏蠅只有腳存有味覺,而且每次進食前都嘔吐一輪 @@ 將面前食物溶解後才吸吮..... 

透過顯微鏡,大人小朋友可睇到烏蠅不同部位結構,而且機械動物曉講曉郁,核核突突都一定吸引到大家注意。

接住落嚟係感受狗狗過人嗅覺,呢「氣味記憶」,可以用來霸地盤,自我防衛又或者吸引異性,大家可以用手捏一下氣泵,從上方聞聞 [超級溫馨提示: 請勿大力按,亦唔好大力索 @@]
「糞球大賽車」 - 講嘅係糞金龜Dung Beetle,佢地主要糧食就係其他動物嘅便便,所以佢地絕對係收集糞便能手,將便便推成球狀,或者埋喺地下,又或者直接當育嬰床,總之一生同糞為伴 well............

「毛球拉力賽」- 有養貓貓嘅朋友應該對於貓星人吐出毛球呢樣野唔陌生,貓貓喜歡舔毛,但在過程中就會連毛一齊吞進食道,久而久之毛球會積聚胃裡,若然毛球太大嘅話就會影響消化和進食,所以一有機會就會吐返出嚟

「牛牛進食記」應該算係展覽其中一個重點展品,好多人都知道牛有四個胃,但又講唔出邊四個,又或者點運作,點樣將食物反芻而達至最徹底嘅消化?機械牛牛以 「能量穿梭機」滾球管道同機動裝置,將食物消化過程重新演繹一次;每左屬於一組胃室嘅消化管道時,就會有閃燈標示,小朋友要幫忙控制每個消化程序,算係其中一個最有趣嘅裝置。


本來魚子醬對Tapeworm [絛蟲] 冇咩興趣,但因為「與絛蟲拔河」有一個座廁模型,而馬桶內真係有舊C而大叫興奮 XD 上面嘅圖解正好可以解釋比佢聽,平時食得菜少~食得太飽~塞住晒就會肚仔痛,同點解會肚痾;

另一邊廂就有人性大考驗「皮膚自衞術」XD好多人都怕玩伸手入黑箱,摸摸先知質感到底係咩,再睇睇自己估得!第一次試嘅時候真係要D勇氣。

來到最多人排隊嘅一個遊戲「吐出小寶寶」 [其實也只是45個人] 呢度有小朋友喜愛嘅彈珠遊戲,就好似青蛙吐出小B一樣;魚子醬表示同前幾日大阪夏祭玩舊式彈珠機一樣,每發子彈都要自己放入機;雖然每個小朋友只有五次機會,但過程確實好好玩,保安阿姨都會幫忙管理秩序。


在古怪動物園「便便大檢閱」內,又係一個關於屎尿屁嘅玩意,冇錯,嚟呢度就係要探討呢D噁心習慣吧!大人小朋友可以利用相機瞄準不同大小嘅便便,然後再估由邊隻動物排出 XD 全個遊戲都喺觀景器內進行的,當你望入去時,自動會出現中文指示。


睇佈局,應該來到最後一個重頭展品!大概係暑假前又係星期一嘅關係,人流未算多,可以直接入去,呢個 「海底奇遇記 」其實講到底就係捐山窿瀡滑梯!第一次入去時,仲未知道有咩機關,工作人員示意「四歲以下家長可以陪入去」咁我就跟住入啦.........然後......

OK~~~內裡係潛艇格局,仲介紹左唔少海洋生物包括水母等習性,睇完後小朋友仲可以玩瀡滑梯!睇住小朋友不停捐來捐去,又有大人捐,咁就一齊捐啦~~~well...

Shit.....一心諗住上到去應該仲有一大段路先到....點知....已經係滑梯!仲要都幾斜下 @@ 結果成個癲婆咁瀡落去,面對住出口兩旁等候小朋友出來嘅爸媽,表示很尷尬=.= D玩意都係留返比小朋友玩好D...大人跟入去玩差d塞唔入 XD各位家長可以注意下。



整體而言,如果小朋友本身對動物有興趣話,家長可以從不同角度介紹佢地比小朋友認識,畢竟科學館內仲有其他大大小小玩意可以順道參觀一下;暑假流流長,雨季室內好去處是也!

古怪動物園
日期: 2016年7月1日至11月2日
休館日: 星期四
票價: $30 / $15 已包常設展覽廳 [星期三: $10/$5]

0 Comments:

發佈留言

幼稚園生與全職媽媽。上山下海的鐵人家族玩樂指南。堅持「以大自然為師」的教育理念,希望認識到更多志同道合的家庭!發掘更多親子好去處。親子專頁: http://www.facebook.com/xavi.hk


品牌。傳媒合作
歡迎隨時聯絡
Email: megan_wong@ymail.com

Related Posts Plugin for WordPress, Blogger...