【親子好去處】荔園 Super Summer 2016 夏日大晒 - 妖怪手錶黎晒啦！

昨天魚子醬一早計劃前往機場博覽館的探索大自然遊學園 x 動物農莊，其實我們每年都有去，真心推介，也覺得愈大愈適合。但日前果籽團隊相約我們到荔園傳媒優先場試玩，反正順路，就硬闖一次吧！ [去年荔園設在核心內圍時，我們在臨結束的前幾天都有去過^_^;;]

向來都在機場轉機鐵，但因為Hall 8+10 在博覽館西口，即使搭鐵也要走一趟，反而在T2 泰潮旁邊有天橋直達咁滯，只是數分鐘腳程 [開心大發現 XD]  

去年有城堡入口，有大象天奴噴水，恐龍化身滑梯，最有回憶都真係扔香口膠同叮叮船 [最最最掛住係好似超大輪盤一樣，自己揀心水禮物的一格，放下金幣，如果指針最後停在你選的一格，獎品歸你！] 魚子媽小時候幾乎每周到荔園，婆婆太寵我了，不知留了多少腳毛

其實打懷舊牌，頭一年就話有話題性je，第二年就開始覺得你「又黎？」而事實這次已經完全是一個掛名的嘉年華，但掛得黎帶點無定向，場內大量妖怪手錶的場景，小朋友可以玩的，110cm以下都幾乎都家長陪同，陪同又是另一份錢，最刺激的 110米充氣大暴走，就需要130cm以上才可玩。講到尾，都真係錢錢錢同錢 [很重要所以要講四次] 

 Mon-Thu入場$140包10個代幣；Fri-Sun 10-12nn進場的話，同樣是$140，但12點後就要$180包12個代幣；4歲或以下免費進場，但其實同時在消耗大人的代幣，加上要陪玩，其實10個代幣玩1,2個game可能已經用光，之後就要唱錢 $10一個代幣

魚子醬是個忠實的妖怪手錶粉絲，一入場見到櫻花鎮，已經忘我失控。姐姐遞來一張收集印章的卡紙，小朋友可以在村內各處收集印章，包括地縛喵、USA繃、哥瑪兄弟等 

這個 妖怪手錶不可思議之旅 櫻花鎮，街道上有不同的屋仔可入內，各處都有互動的遊戲，適合幼稚園生 

場內燈光稍暗，而且到處都用上不同顏色，所以想影靚相就要多花功力了，魚子媽還是懶散的用手機算；但只要人不多，其實背景美美的，也能拍出好照片 

 

在學校?門前有地縛喵的立體公仔，應該會是最受小朋友歡迎的一個了！而且這裡每隔幾分鐘就會從上方灑下大量粉紅紙碎，模仿櫻花落下，小朋友超開心，拍出來也超美，就算是把玩地下的紙碎堆，一樣開心

雖然大部份都只是平面公仔圖案，但配合四周的場景，還算不錯；屋內屋外，感覺截然不同 

開心呠呠車，身高限制110cm以下才可參與，3 Token 10min，小朋友玩的車車是平日在幼稚園玩到的那種，但比較高身和重身，加上必需脫鞋玩的關係，根本著了防滑襪也發唔到力。魚子醬玩了三幾分鐘突然落車推，泊好車後就自行著鞋離開 ^_^;;; 一邊著鞋一邊話「太跣啦....都行唔到ge！」 大家自行衡量玩唔玩了

恐龍滑梯不再，換成Dino Dum Dum跳 [3個代幣]，90-110cm需要家長陪同 [加1個代幣] 時限10min，但真心講句，內裡範圍不大，而且又暗，影相次要，但悶ga ma...魚子醬又是跳不到10min就放棄 [若然人多的話，昏暗環境也要考慮安全問題] 魚子媽建議大家，影相仲好過入去跳

來這裡記緊著襪帶襪，否則1 token 一對 [比起其他活動/playhouse 都算抵 XD] 

 親子小花園，其實是有不同的工作坊，例如用3D畫畫筆製作眼鏡/匙扣，又或者手偶、襟章，砌車之類 [5個代幣，科技創作6個代幣] 但6歲以下又要家長陪，家長陪又要3個代幣，即係$80玩一次...um.mm...如果真係好需要消磨時間，是可行的

魚子醬挑了用3D筆整眼鏡，整整下其實係呀媽整 =.= 然後又發覺要將這些公仔麵整成堅固的物件，是需要重複重複重複，問姐姐「整副眼鏡要幾耐呢？？？」 半個鐘到啦 @@!!!! 唔該晒，我整一個鎖匙扣得啦咁；所以話，消磨時間是非常好的 

魚子醬表示，前前後後玩了這麼多，彩虹波波池都算是最好玩的一個，遊戲5個代幣10min，但90-110cm又要家長陪wo..又多3個金幣，又是$80 十分鐘的遊戲，所以你話呢....魚子媽真心建議大家到playhouse 任玩一日算；這個場地算大，10min爬得黎又玩唔到波波池同下面ge玩具，而且要家長陪爬，是一件很辛苦的事=.= 

職員是多，但作為家長覺得場地職員過份矯枉過正，當在滑梯底等候魚子醬第2,3次滑下來的時候，忽然有位senior的職員問那位是小朋友父母，表明「唔該你可唔可以勸諭下你小朋友，要坐正，雙手交叉在心口放好」 @@下.......um....我諗真係勸唔到，玩滑梯他們還在行，又不是滑水梯，唔洗交叉係心口掛。當下沒有出言頂撞，只覺得職員太怕揹鑊，明白安全要緊，但不至於要這裡訓示家長，上下都有職員協助

不是味兒，轉戰波波池，魚子醬今天全身只有藍與白，波波池也是，相映成趣的畫面。在波波池大人小朋友都玩得開懷[人少的話] 

場中佔地最廣之一的，有這個 蘇飛的奇幻世界，是有三條不同路線的迷宮 

但其實入面完全唔會行錯路，三條路就是三條路線，ummmm...失去了玩迷宮的變趣，主辦單位似乎是想大家欣賞入面本地插畫師 林皮 Crossover 的畫作多d ，所需代幣4個，110cm以下又要家長陪，加多2 tokens 連哥哥姐姐都話，如果覺得條路太短好唔抵，就見到EXIT行返轉頭搵第條路啦，因為一出左黎就要再收錢 ^_^;;;;;;;; 滴汗，我們第一條路只用了幾十秒

場內最吸引的 充氣大暴走，只適合130cm以上的朋友，收費6個代幣，魚子醬有排都未玩到，有興趣的朋友可以移玉步到 大仁生活 看看 

攤位遊戲，以卡通人物來分門別類，妖怪手錶的一個最為搶眼！而且玩法最為溫和，小朋友也可以輕鬆Handle得到，是碌乒乓波得分，大中小獎都是地縛喵/哥瑪先生/哥瑪次郎，文首魚子醬拎住ge地縛喵，就係係呢度贏返黎 XD 所有攤位都是2個代幣一次

小露寶是歡樂天地扔波波，魚子醬一個唔該幫我扔晒落地 >_< 以前係歡樂天地/海洋公園，職員見到都可能第一次會唔計，當小朋友唔小心，但呢度d姐姐係完全無表情不理會..咁我地又無追究，扔唔到咪算，不過返返去玩地縛喵開心d~hahahaha

扔階磚不再是香口膠，而是大小不同的熊Bear，吸引度一般 

NERF的射擊遊戲，發覺近年大小活動都好喜歡以此作攤位，事實又真係幾好玩 XD  輕鬆取得中獎，但獎品其實唔太吸引，選了個 超力電磁俠 [n年前卡通?] 的環保袋

大象天奴今年不玩噴水，但扔蕉入口一樣會搖頭郁鼻，而且哥哥話佢每隔一段時間就會痾便便 XD 1個代幣 = 2隻蕉，個人認為都幾易扔的，不過就自己計下數，d代幣要用得其所。 

場內的飲食，都是$30-50食得飽，熱狗、雞脾也是$3x，毗鄰有Ebeneezer's Kebab 

在攤位遊戲搶略一番後，魚子醬還是鍾情櫻花鎮的妖怪手錶，玩玩玩，影影影，今天小朋友不多，可以盡情影

其實確實頗欣賞互動遊戲連三歲小朋友都應付到，但問心，又值唔值山長水遠來到，付鈔入來影？忍手只玩手上的代幣和齋影場景？又好似好快就閃得？ 

場內還有妖怪手錶的pop-up store，但貨品種類普遍都是街外買到的，吸引度一般，路過可以一看 

總話而言，若然帶著4歲以下小朋友來，雖然只付一人價錢，但代幣又有限，陪玩陪玩，又好快玩晒。場地外還有首次登場的電動高卡車 XRace，限150cm以上玩，但不是以代幣，是$280一節，45分鐘，但連登記/訓練/穿戴安全裝備，真正玩ge時間得8分鐘，爸爸們可能會較為有興趣，自行衡量下吧 XD