鐵人家族的生活原則

=================================
鐵人家族的生活,就是在藍天白雲的時候「及時行樂」,
讓大自然成為孩子的導師所以天晴的時間,文章更新速度會慢慢慢慢慢慢慢,因為我們都往外跑了!下雨天就是博客更新得最頻密的日子
我們的文章都是有血有汗的真實分享,請尊重版權,要轉載請標明出處,謝謝。
=================================

4/04/2015

魚子醬玩樂手記 - 馬會130周年「同心同步同樂日」玩樂行程+策騎小馬門票攻略

馬會130周年的重點活動「同心同步同樂日」一連三日在沙田馬場舉行,魚子醬一家在第一日就來到玩樂,事後無論在巴士又或者網上都聽見不少「排到死,安排差」的評語,但我地玩左4個鐘,又完全無火爆過,玩得好開心,都算順利,分享一下我們的小攻略吧~!

活動10am開始,我們在假期可沒有能耐特登早起早出來霸頭位,黎到ge時候已經大約12點,起初的確有d不知所措,第一次來馬場四處走,地方之大,用了15分鐘去摸熟地形 

由遙遠的「第7區」亮相圈那邊走到人流集中的區域,DIY Workshop同攤位遊戲 「3,4,8區」,攤位遊戲係無獎品的,有其中一兩個玩完好似無玩 [係池內用夾夾返d讚美字句交比姐姐,完],不過意念是好的,另外都有好多要用腦力多點的,好似「智趣家庭迷宮」就將平日桌上的小遊戲變成一家大細同樂版本

現場仲有幾個值得推介的攤位,好似十幾年前興起的電擊捧玩意 「眼定手定 人氣家庭」,仲有用兩枝棒棒控制鐵球跌落顏色窿窿ge「家添正能量」 

係室內攤位區走出室外就是公眾席,隨便坐下休息下,成個公眾席一定唔會無位坐 

1pm有 Cavalia 的雜技表演,仲以為係體適能測試「第8區」 前的草地,原來係較後方有軟墊的公眾席地方,大家可以隨意坐上去欣賞,我們就選擇企係兩旁ge欄,仲近仲好睇! 雖然呢類雜技表演不算創新,但每次睇都會嘩聲四起,眼見佢地翻騰同跳ge動作都好俐落,有d可以請爸爸玩獅時參考一下



雖然在中環帳幕下真正的Cavalia表演會有馬術,黎到呢度就無馬同行了,不過免費的還想點??? 正式的門票山頂位都要近$400,VIP位要近$2000 

Cavalia 表演大約20min,完結後就聽到廣播說第9區將有越野賽示範,似乎這邊的人都一湧而過隧道到 彭福公園,兩邊隧道口都有細小的升降機,但人龍就當然長,爸爸同行的,建議大隻佬上身~! 快靚正得多~  
越野賽有五隻馬匹表演,每隻跳過七個欄,活動範圍大,即使站在「非欄位」見馬匹在面前路過都已經會超興奮;因為表演時間長,趕過來都睇到三四隻的表演,精彩精彩~!  

呢個表演可以駐足觀賞的地方多,時間長,非常值得睇,我地都係一入公園就在最近出入口的位置已經霸到頭位睇 

好似都有十幾年無黎過彭福公園,姑且當自已是第一次來了,這棵樹好有廣告相feel,真係大樹好遮陰,樹下可以休息的陰涼地方超多~!!!  

之前都想來這裡野餐,不過原來佔地雖然大,但劃了給馬匹的場地都不少,所以唔算特別特別多大草地,但景色同空氣都好心曠神怡 

行到黎 雪特蘭小馬 合照區,雖然人龍看似長又長,不過4隻馬仔分2pair 2pair咁影,速度我覺得去得幾快,排了半個鐘左右就ok,而人龍兩旁都是草地,小朋友們就在這裡打發時間玩樂,好快過~~~ 


魚子醬問准後都自已去玩了~~~走入樹叢後久未出來,原來後面有個「小樹窿」哈哈哈~就好似一個心型ge小樹叢,小朋友們不停出入,魚子醬就偏愛匿係裡面無事幹~ 

原來呢度都幾多寶,小朋友就係度尋寶 

雖然覺得馬仔全日都要企係度影相好慘,有次路過仲訓緊覺,不過佢地都有時間輪住食草休息ge~魚子醬第一次摸馬仔,好得意ge質感 =P 佢當然唔驚,因為隻馬馴到郁都唔郁~

自由活動時間,在這裡看看雀,爬爬樹,無限放電mode 

黎到最多人關心的「策騎小馬」,除左早前網上有得贏門票外,即場都有係「第八區」體適能前方位置派門票。在巴士上聽到媽媽們交換情報,10am一開就派門票,10:05am已經派晒,真係要等10am入場然後就衝過去~~~而下午的門票1pm開始派,11點幾其實已經滿額,不過12點ge時候見到隊尾成班人同保安職員嘈交,話唔比截龍,明明封好圍欄都比呢d野惹爸爸扯爛晒,最後保安話,要排就繼續排,但派到你無晒唔好嘈。其實得幾十張門票,排最頭的應該排左2,3個鐘

提提你,4月4日只有一個派發時間1:30pm,而5號就同樣設10am & 1pm派發,早2小時排隊,又或者勁勁早等入場,10am一衝入場就排隊 [派門票位置都幾近入口,有大牌標示],緊記要3歲 以上、90cm以上,及120lb以下ge小朋友先玩得

大部份workshop都要5-8歲以上,所以我地不多理會,但workshop係幾好玩的,大d仲可以有皮革DIY,可以早d去拎籌,2,3pm就會派晒全日ge籌。So Far我地玩左四個鐘,玩到睇到所有預期中要做ge野,食物都唔算貴,雞脾、熱狗 $27@都幾大隻,爆谷$20,樽裝飲品[水、茶、汽水等]大約$14-16 ,反而Food Court唔抵食,建議大家去小食亭已經好ok,公眾席又多位坐,除左雞脾 熱狗,仲有魚蛋燒賣、碗仔翅、牛雜都有~飽肚的

希望不久將來又再有呢d同樂日~~下次見~~!!!! 有城巴作為穿梭巴士,來往沙田近ikea及馬場,一滿就開車,班次好密,推介~! 大家想睇埋活動時間表同地圖的話,其實活動ge網頁已經有好詳盡ge資料,可以好似魚子醬一家咁,預早plan定大約幾點做d乜,會有系統得多
參考連結:


0 Comments:

發佈留言

幼稚園生與全職媽媽。上山下海的鐵人家族玩樂指南。堅持「以大自然為師」的教育理念,希望認識到更多志同道合的家庭!發掘更多親子好去處。親子專頁: http://www.facebook.com/xavi.hk


品牌。傳媒合作
歡迎隨時聯絡
Email: megan_wong@ymail.com

Related Posts Plugin for WordPress, Blogger...