鐵人家族的生活原則

=================================
鐵人家族的生活,就是在藍天白雲的時候「及時行樂」,
讓大自然成為孩子的導師所以天晴的時間,文章更新速度會慢慢慢慢慢慢慢,因為我們都往外跑了!下雨天就是博客更新得最頻密的日子
我們的文章都是有血有汗的真實分享,請尊重版權,要轉載請標明出處,謝謝。
=================================

6/09/2015

【親子行山】 河背水塘家樂徑 - 群山環抱的水塘最美景色

這兩星期有d日子真係望住個天會諗「唔去玩真係對唔住自已!!」偏偏最好天個日,明明午睡前同魚子醬deal好,早d訓早d起,早d行山,點知............11點半訓到3點半.....想點!好彩依家夏天,太陽伯伯7點先落山,拿拿聲落街食個Late Lunch,照出發!這天的目的地是 - 河背水塘!其實上次走甲龍林徑的時候就想來,不過不宜過勞,就決定另覓日子

元朗泰衡街有71小巴總站到總站,在河背村落車就OK~! 不過為了省卻時間,就決定直搭搭西鐵到錦上路站,車程都還需要半個鐘,鄉村小路要單程雙線讓來讓去。一落車就見到香港青年協會有機農莊ge牌牌,跟住農莊方向就等於去緊家樂徑 =] 不過穩陣起見,都問左問一同落車ge學生哥,雖然佢表情完全係「依家先上山!?!?!@@」不過都解答左我ge問題~~~其實已經5點半,呢個時間先上確實有點兒嚇人

經過已荒廢ge馬鞍崗村幼稚園,想起兩年前想搬,曾經找到一間在馬鞍崗的新式全新村屋,全玻璃天台,不過那時對馬鞍崗這地方完全無認識,屋主話係大欖轉車站行到去,魚子媽一心諗住城門隧道個d轉車站會後面有路行落去??? 即刻耍手擰頭,到這天才知道原來大欖隧道轉車站雖然係大公路,但真係一落樓梯就係完善ge村落馬路,亦有小巴行走,失覺晒 [不過路經馬鞍崗村ge時候,又真係見返個間屋,算了吧 =P] 

穿過民居,來到山路路口,往左走,一直上山就對了~!  

最傳統ge S型繞上山方法,一開始就係斜路,無樓梯,因為一直都係車路,不過係要有特別許可ge車先上得,所以唔好諗住私家車直上家樂徑,是不被允許的;好斜..由山腳到山腰的水塘位置,直線距離計上升了180米,大約2.5km,其實有點吃力;魚子醬由最初跑住上,到行到中段不斷「媽咪~我真係好累啊」「媽咪~可唔可以抱」 

兩雙涼鞋,跟這對小腳板走天涯,由淺入深,希望2015年來可以走完全香港的家樂徑 [對2歲多小朋友來說也是大挑戰啊]

看到第一個告示板就知道找對路,雖然板上寫著大欖越野單車徑,絕對正確無誤,可以繼續向上行,要是weekend的話,就真的要小心有單車/汽車上落 

風景真美,因為八鄉這邊都是村落為主,視野開揚,走上5-10min路程已經可以看到西鐵的車程全貌和元朗一帶的景色 

因為時間不早,媽媽又心急,加上自己體力都不太夠 [前一晚3am才睡] 所以有一段時間是採取不說話拖行方式,真係無氣應你啦喂

來到T字路口,要是一直走不上斜的話,就是連接石崗雷公田的地方,6pm,天色開始暗了一度,望著前方滿是樹蔭的路,其實真係有d淆,雖然途中有見過一架貨van上落,都好後悔無截順風車 XD 但幾乎肯定整個山頭只有我倆在步行,加上近期看過了幾篇山精、結界、行極行唔返落山主題ge故事,硬著頭皮上吧! 魚子醬有頂唔順ge時候,就騎膊馬跑上去! 

行極轉極都仲未到,眼見時間不多,真係好想放棄,到終於見到有機農莊,忍唔住要入熱沾沾人氣,裡邊的姐姐見到我地,叫出聲「我地閂左門架啦唔好意思」聽到有人聲真感動,明明原本真係無需要入內,但這刻好想沾人氣,就借機問家樂徑仲有幾耐到,因為見門牌寫家樂徑1號,應該都算到了吧?? 原來再往上走5分鐘左右就會到

半小時的上山之行,感覺更長,但至少一直是平路,如果真係要推BB車的,都係上到ge! 不過就要d氣力啦 =]  

下午六時的好風光,一樣藍天白雲,百看不厭,頭先幾辛苦都Goo一聲吞晒,不停思覺失調咁自言自語「呼~真係好靚~真係好靚~真係好靚」 

相片中的水壩表現不了那壯觀的氣勢,但當你站在壩頂的時候,聽著水聲,就會覺得非常磅礡,可惜時間有限,沒有走入家樂徑 [正常繞一圈約1hr]在S型的水壩橋上拍拍照「到時一遊」就算了 


魚子醬上到來都跟媽媽一樣不停大讚好靚呀!!!! 即刻生猛返,可見大自然的威力多強 


這天風有點大,水塘沒有波平如鏡,拍不了最美的倒影,但涼風吹送也是好事,站在橋上,真的不想離開 

左拍拍。右拍拍,辛苦了半小時,完全值回票價!我們倆的心情都大靚



曾經看過行山友的照片在無風的日子如鏡子,一定要找次機會再來深度遊! 

魚子醬平常影相埋位都算合作,但今日係不停要求影相,擺定pose,這裡的美,跟鳳凰山頂那種壯麗不同,因為水塘被群山環抱,加上天色如此美,真係「天時地利人和」 

用風景來治療上山的失落,完全是100%治癒系,拍照拍到不知時間,直至背光的時候看見太陽又下降了些,才知道要快走了~落山的路有點斜,不能太快衝

匆匆多拍幾張照,才醒起未飲水! 哈哈,景色太美了,趕羊飲水咁,拿拿聲又要起程落山,只逗留了10分鐘,行得咁辛苦好唔抵??? 錯了,行半個鐘睇到10分鐘已經非常化算,而呢10分鐘係人生中看過最美的景色之一 

天色又暗了一度,雖然依舊看到藍天白雲,但山路的感受更強烈,於是跟魚子醬一邊唱歌一邊大踏步走落山 ^o^ 

接近山腳的時候,太陽都快下山了 

一直急行到山腳,才放心讓魚子醬放手玩一會,而這天他確實做得非常非常好,在有限時間內用上double體力走這段路,絕對要大大力鼓勵一下 

在村口等小巴,拿出小獎勵,一盒熊仔餅已經足夠開心,還有我們的「人力芭蕉扇」一同分享,我們家沒有現在人人手執的電芭蕉扇,也未有開冷氣的打算,人健康d,忍耐能力高d,即管睇下可以撐到幾時先開冷氣 XD 

無疑這個河背水塘家樂徑真係香港美景之一,也算易於到達的地方 [2歲小朋友也走到],小巴站行半小時上山就到。只是這天執意要來,時間不足,不能深度遊,找個周末跟爸爸一起來吧! yamababies 推介給大家的親子郊遊好去處,記住,河背水塘!

交通:
71號小巴 元朗(泰衡街) <> 石湖塘,河背

相關文章:

2 則留言:

  1. 妳一個人帶魚子醬去??犀利!!
    周圍都冇人驚唔驚呀?

    回覆刪除
    回覆
    1. 路段係無問題加無難度的,但淆到high high....以後都唔敢再臨天黑先行山...不停起雞皮

      刪除

記錄現年九歲的山系男孩 魚子醬 與全職媽媽 Megan 上山下海玩樂日誌。由100天赤足踏在草坪沙地開始『以大自然為師』的成長理念。堅持實話實說。絕不阿諛奉承。藍天玩樂至上。雨天咬文嚼字。在本港教育制度中尋找喘息的空間。拒讓小孩當分數奴隸。只願當個真正的親子玩樂Blogger。不願稱作山系KOL。永遠相信讀者的眼光是雪亮

文字工作者。閒來執筆分享世界任何一個角落的親子好去處。為報章供稿。在傳媒訪談中分享小孩與大自然的互動。每天享受Work-Life Balance

邀約合作請聯絡: megan_wong@ymail.com

Related Posts Plugin for WordPress, Blogger...