鐵人家族的生活原則

=================================
鐵人家族的生活,就是在藍天白雲的時候「及時行樂」,
讓大自然成為孩子的導師所以天晴的時間,文章更新速度會慢慢慢慢慢慢慢,因為我們都往外跑了!下雨天就是博客更新得最頻密的日子
我們的文章都是有血有汗的真實分享,請尊重版權,要轉載請標明出處,謝謝。
=================================

11/06/2015

【親子森林課】魚子醬勇闖銀礦瀑布!

嬉山莫嬉水,睇黎魚子醬兩母子已經玩到無野好玩,去左玩。瀑。布!但其實秋季乾爽少雨水,趁天氣仲熱,玩下都無妨!除了大埔滘郊野公園是「森林幼稚園」上課地點,魚子醬也找到個比較方便 [errrr.....交通上都算係掛] ge地點,希望將來有機會同大家一齊來

話說每天返放學的路途上,都是我觀天之時,每每看見藍天就會睇下挑起邊條癮,立馬出發,這天放學換好行裝,做好功課,讀多兩本故事書,就出發到~~~~~~梅窩!友人sss一聽見目的地都暗唸了一句「傻的嗎!無啦啦入梅窩」最後都只有我們倆 [其實...好近ja ma] 

我們的目的地是銀礦瀑布,如果你係搭3M巴士的話,由東涌市中心坐到梅窩街市站,係比較近的;如果是由中環搭船進來,沿著出碼頭右手邊維修中的路一直走,就會到銀礦灣海灘,途中會經過門面靚靚ge冬菇亭熟食市場



實不相暪,魚子媽都係開住google map導航ja,大家最後會找到球場旁有指向 南山古道 的標示,跟著地圖繼續走就對了,沿路都是車路,沒有小路 

如果從前來,要找瀑布可能幾困難,但依家基本上指示清晰明確,政府銳意打造大嶼山的旅遊景點,沿路見不少外國人拖行李行入去,平坦大路易行的。只係在這些小鎮,人人單車代步,回到從前一樣,我們靠11號巴士的,係人都知我地外省來 XD 好傻B的感覺,條路行就行30min,其實真係無乜野難度,不過人人踩住單車係身邊經過,你就會覺得,佢地10min已經會到 >_< 


明明係東涌都仲藍天白雲,霎時間就厚雲蓋頂,這幾天都是這樣,中午前都大好天,然後慢慢厚雲積聚,人算不如天算,無計 

市區的playgroup興趣班中心門口,可能一堆BB車,呢度就一堆單車,全民單車的小鎮,在香港無幾多個地方係咁了,有趣的畫面;裡面坐滿小朋友,大概是因為父母都在港島/東涌上班

走到人家門前的跳飛機,興奮的玩起來!大概是因為學校都有呢個玩意,K1小朋友原來已經學識點玩,叻叻豬 


闊大的道路一直有明確指示,不會迷路,皆因政府將其命名為奧運徑,由來是藉2008年北京奧運而命名,但由頭到尾都沒有在這段傳過聖火,都無活動在這邊舉行,純粹想食住個勢 [都幾無聊] 

到達銀礦洞與銀礦瀑布之先,會先經過文武廟,魚子媽興趣就不大了,但外國遊客出出入入,表示新奇有趣;奧運徑的終點站就是白銀鄉,穿過這門牌後,就幾乎會看到瀑布的下游了;及後會看見一平路、一斜落的分支路,向下的就是往礦洞參觀,平路就是往瀑布

實話實說,來這裡絕對是BB班級數,就算你推住BB車來都得,瀑布旁邊有大涼亭,車泊在那邊,人走幾步樓梯落,而且來到銀礦瀑布之下,何其壯觀!當然在盛夏雨水多的時候會更美,但跟小朋友來,就安全第一好了 

一直看過下游的方向,都是很適合小孩落水玩的淺水區,流水不算急,水底的平地也多,當然不少位置都有青苔,小心為上 

看過下游,這絕對是我們往後森林課的好地方,可見水較深的地方,都只係到大人ge小腿上5吋下5吋,安全安全 

大石位置多,要移動都不難;本來跟魚子醬說好來玩水,但藍天一下子消失了,又有零星雨點,下次早上來再玩個夠了 

在華富村其實還有一個瀑布灣,但因為那邊唔太老黎[自已chk chk啦],政府部門用欄封了小路,要去的話就要做一做劉翔,不過那邊民居多,上游污染嚴重,有朋友前陣子到過,說有些位置真的臭到一個點!真佩服仲係個度影婚照的新人; 而銀礦灣這個,水清澈得多多多

無得玩水,丁點失望,不過魚子醬最後都有除鞋濕下腳,算係玩過下野嘛!仲有係石間穿梭,玩得過癮


呢兩個燒烤爐自成一角,因為成個瀑布公園就係得呢2個燒烤爐加大涼亭同公廁,點解咁都可以叫公園呢其實? 


不過呢個公廁的外型設計,硬係覺得好似有d野咁,風水味好重,any肥,平時d公廁都已經咪搞,呢個更加唔想試 

小朋友在大自然的快樂,總會比大人察覺到更多微細的事物,這邊廂在吹蒲公英,那邊廂又執樹枝打雜草 [好似執到寶咁] 

希望找個晴朗的一天,可以實現由DBay行來梅窩,老虎頭、神樂院都是我們想到的地方 ;至於為甚麼我們來到礦洞都不看看,一來係企係門口得個窿,二來入面雖然有小河可以乘船遊覽,有d鐘乳石睇下,不過勁多蝙蝠,一諗起病毒宿主這問題,相信無乜人會想入掛

回程上,有人放牛,魚子醬又想衝過去,但今次隻隻都「牛高馬大」邊食邊大叫 ~~個d聲係遠處聽勁似鋸樹剪草ge聲,行近先知真係牛黎 XD 

走了又走,回到沙灘上,一直以來都覺得銀礦灣酒店成日搞團購應該都好梅下,但原來地理位置一流之外,都ok ar~而且外國人多,感覺良好,可以有下次,而且任食bbq只係$128,整個親子一天遊,玩完水黎任食,仲有無敵大海景,小朋友玩沙灘,perfect 


我們將沙灘與瀑布的次序對調,雖然來到沙灘之時都快將入夜,不過魚子醬還是自得其樂;沙灘上有無數個大大小小ge窿,其實應該係蟹仔ge窿? 但佢每個都伸隻手入去,其實企係側邊ge媽媽都不知幾淆底,好怕會突然聽到大叫,然後連手帶蟹喪FING 點算 


回到碼頭,督見每個落船ge人都找回自已的單車,嘩~!!!個停車場真係可其壯觀,係香港見過最最最最最多單車ge地方,相入面只係冰山一角ja~相信係呢度應該無乜偷單車黨,人人都有一部 

曾經有一刻諗過比小朋友搭下船,但一諗過放工時間往中環跑是自殺行為,就乖乖等返車出東涌算啦 =P 應該好快又會再來!期待晴空萬里的日子! 繼續追貼 魚子醬鐵人家族親子遊 ,帶大家到十八區的親子好去處吧!

0 Comments:

發佈留言

記錄現年九歲的山系男孩 魚子醬 與全職媽媽 Megan 上山下海玩樂日誌。由100天赤足踏在草坪沙地開始『以大自然為師』的成長理念。堅持實話實說。絕不阿諛奉承。藍天玩樂至上。雨天咬文嚼字。在本港教育制度中尋找喘息的空間。拒讓小孩當分數奴隸。只願當個真正的親子玩樂Blogger。不願稱作山系KOL。永遠相信讀者的眼光是雪亮

文字工作者。閒來執筆分享世界任何一個角落的親子好去處。為報章供稿。在傳媒訪談中分享小孩與大自然的互動。每天享受Work-Life Balance

邀約合作請聯絡: megan_wong@ymail.com

Related Posts Plugin for WordPress, Blogger...