鐵人家族的生活原則

=================================
鐵人家族的生活,就是在藍天白雲的時候「及時行樂」,
讓大自然成為孩子的導師所以天晴的時間,文章更新速度會慢慢慢慢慢慢慢,因為我們都往外跑了!下雨天就是博客更新得最頻密的日子
我們的文章都是有血有汗的真實分享,請尊重版權,要轉載請標明出處,謝謝。
=================================

12/09/2015

【輕鬆登上山頂!】親子行山超短家樂徑 - 坪洲手指山「天崖海角」180度海景等緊你

前排同大家介紹了鹿頸谷埔看蘆葦草的超易行山徑 - 吊燈籠徑,個邊雖則話易,都要行返一個鐘多dd,中途不難遇上小孩扭抱? 今次同大家介紹的這條「天崖海角」超級美景等緊大家的極短程家樂徑,仲可以輕易登上山頂!!朋友仔見到張相都話「嘩!!好想攬住條柱喪影相!!!!!」大人用跑的,應該5分鐘已輕鬆登頂,真係講你都唔信!

坪洲這個地方,在有記憶的這些年都好似無乜黎過,跟其他離島一樣都有船來往中環,但這裡卻沒多少遊客,跟長洲是兩個世界,大愛!這裡就像繁華dd 的大澳,交通方便d、校網好d、社區設備齊全d、濕貨齊款又新鮮


碼頭外面同樣泊滿單車,但就無梅窩咁墟冚!街道闊落,只有鄉郊運輸的車和救護車等會行駕在道路之上。

不像南丫島與大澳,被新一代的西式文化蓋過了傳統,這裡依然有辦館式的超級市場,前後左右都是真正的冰室茶記 


麵包舖要名嗎?直接叫麵飽舖就得啦,因為交通方便,這裡的物產真的比較豐富,街坊生意價錢相宜
 


可能你會問:「咦!坪洲係咪即係蝦多士好出名個度?」無錯!但祺森正在豪裝緊,魚子醬一行四人決定走到累就入邊間,最後試了金源冰室 

雖然物價成本上漲是事實,所以小區的價錢都唔會特別平,我地見2大2小,仲叫左3個餐,點知..........每碟都好足料,飽到撐!



好耐無遇過咁飽滿的火腿奄列,真係自已整都無咁多火腿 XD

成間冰室,由門口傾到入水吧都係街坊,好明顯我地幾個真係遊客feel得很~~~anyway~~聽下d街坊叫乜野食先最重要~~見到有人一碟薯條咁叫~又見有人食粟米石班飯,見特餐有石班薯條 + 煙肉公仔麵,呢個咁新鮮ge特餐組合,即點!粗身波浪薯條是皇道,成枝茄汁放係度任落,熱到辣口,正!石唔石班就唔知細分~不過面前呢塊炸魚真心好食!四個人不停食~~~

係腦海裡,特餐永遠都係雪菜米或者叉燒意,煙肉麵真係第一次 XD 煙肉多過麵咁滯啊~~ hahaha~

香港近年好流行懷舊復刻的冰室,為甚麼卻不珍惜真正的冰室,人總是「失去時才學懂珍惜」。在坪洲九成的餐廳都是這格局,牆上掛著的食物圖片,都是手繪而非相片



離開冰室,大家可以問問途人又或者問下魚子媽的知己 google map 點去兒童遊樂場,是個非常新式的遊樂場,玩樂空間非常充裕

叫得大家黎當然唔會流流地,都是最新一代的設計,好玩度比屋村遊樂場高得多!不規則的攀爬架與小小攀石牆,這裡都不缺;而韆鞦則有齊BB與小朋友各兩個





坪洲市沒有太多可逗留的地方,因為不如大澳般多小吃,不可能邊行邊吃,因為頂多1,2間已經撐爆大家肚皮,這趟的重點是推介大家行超超超超超易行的超短家樂徑,信我,無論你扶老攜幼,雖然開初有數十階級,30分鐘包你去到終點「天崖海角」.兼睇到超靚風景

家樂徑的起始點正正在兒童遊樂場正後方,大家可以先行在樓梯底的公廁方便方便 [帶著小孩必做的事] 之後就可以放心起行了!!



樓梯說多不多,一兩分鐘已走畢,沿路都得這樣的平路

對比鹿頸谷埔的沿海路徑,這次真的行山,不過大家放心,全港第二高的鳳凰山是957米高,而今次要行的手指山是..................95米高 =o= 係咪諗都諗到有幾易,所以~如果平時好想影下唔同山頂ge三角測量站,但又無乜體力的話,誠意推介大家來影飽佢~wakakaka

一直走走走,直至來到這個手指山休憩處的十字路口,真正為行山的,還有大個圈可走,而只為靚景的,親子行山團的,就往銀色地圖板的後方走就可以了


地圖後方的路走幾步後,又會遇見一個左右分叉路!只要看看地圖,就知道其實左右皆通往天涯海角,是一個圈圈,因為左邊全是樓梯經山頂再落山腰,建議大家去程取道右邊的平路,回程就可以落樓梯為主



我們取道右邊的平路,沿路都非常多蝴蝶,笑言在這裡見蝴蝶多過鳳園,鳳園個d好似開行turbo咁飛 XD 由小路出大路之後,會看到一段上斜的車路,無錯,就是上大約50米左右,已經會見到下圖的落斜位,成個山頭的路不多,無乜機會迷路

一行出叢林間的路,大聲嘩左聲!洗唔洗咁靚,真係好靚,魚子媽行最後不停大叫「嘩好大個海呀!好大個天呀!點算,好靚!」180度的海景,迪士尼就在我們的左手邊,前面是青馬橋,右邊是港島南區的風光。加埋呢個銀洲仔亭,靚到一個點係.....覺得筆墨也不足以形容!

終於明點解呢度叫「天崖海角」不少居民都會來這家樂徑散步,又遇上練跑的,又有放寵物的,信魚子媽吧~~30min必定行完

最後入手了新的二合一自拍桿加腳架,真係方便太太太多了,以後可以影到更多合照 [其實平時面皮好薄,勁少請求別人幫忙拍照的說]



我們剛才走平路落斜到「天崖海角」,離開時出返大路轉右,走到尾自會見到樓梯上,得一條路一定無錯,上上上上,因為我地已經係山腰,所以好快就會到山頂 ^o^

見到呢個鳳萍亭,就到左手指山山頂啦~~~yeahhhhhh,其實細細地無乜好做ga ja~不過如果大家對個枝山頂的測量柱有特別僻好ge話,呢度肯定有排影~hahahahahah

好明顯我地都唔例外,加上當時仲有1個鐘就日落,太陽的位置比較低,影相一流,不過無心機執相je~hahahahahaha



這樣走一圈毫無難度,在坪洲走走看,都是民生方向的小店,但正正因為改變不大,很有味道,到處都是影相位,帶小孩來逛一圈也有不錯的收穫




手指山易行,同行街差唔多,加上路程短,小朋友同大人都唔會有頂唔順ge情況;冰室有人情味,大件夾抵食;小區又有不少影相位,加上新式兒童遊樂場,三四個鐘的半天遊,已經好足夠,推介。


參考連結:


0 Comments:

發佈留言

幼稚園生與全職媽媽。上山下海的鐵人家族玩樂指南。堅持「以大自然為師」的教育理念,希望認識到更多志同道合的家庭!發掘更多親子好去處。親子專頁: http://www.facebook.com/xavi.hk


品牌。傳媒合作
歡迎隨時聯絡
Email: megan_wong@ymail.com

Related Posts Plugin for WordPress, Blogger...