【親子行山】屯門徑藍地水塘。超級靚景山中尋 【鐵人活動】

2015的平安夜，中午氣溫直逼26度，天公造美，全日藍天白雲，爸爸照常上班，我們就自得其樂。中午過後，難忍如此美好的天氣，魚子醬提議行山，其實差不多午睡時間，但抱著體力可以預支的理念，出發啦~! 

時間有限，不宜遠行上山，就到家附近的九徑山，進入麥理浩徑10段，往何福堂方向前行，緊接屯門徑一二段，最後步往藍地灌溉水塘 [超！級！靚！] 趕及日落前完成這天的旅程

誰想要一個26度的平安夜？其實在地球伯伯的角度來看，這是很可怕的一件事，最近不少朋友問起我們一家的教育理念，都係個句「讀萬卷書不如行萬里路」係真的，這些切身問題，在旅程中可以一一告之小朋友，例如樹葉遲了轉黃落葉、本來冬天不活躍的動物都走晒出黎，邊走邊學。 但在行山的角度，呢種天氣又無得頂，真矛盾 

簡便的行裝，就這樣出發了！

只係由山腳行到上麥徑，魚子醬已經成個頭濕晒，這天真的好熱 

每個山頭都總有山水捧場客，他們在出水位都裝好晒一d繩，好作固定大水樽，這些都是晨運客的小智慧 

除了藍天就是白雲，在這天氣下，影乜都靚 

在麥徑終點與屯門徑起點稍作休息，我們就正式開始今日的旅程！ 

屯門徑叫樓梯徑就差咁多，因為由頭到尾都有不少長命樓梯，九徑山跟青山對望，走到高處，兩者都可以望到全個屯門市的好風景。

作為晨運的熱門路徑，通常都已經被美化，在途中我們也遇上好些小聚的場地，連呼拉圈都有，用完放回原處即可，也有磁磚水泥鋪得靚靚的觀景位。最重要係「自己垃圾自己帶走」 

雖然日怨夜怨，但其實大家也應該學會好好欣賞自已身處的地方，香港在地理位置上，其實係福地，天災很少禍及香港 

談教育理念，「以大自然為師」，現在問魚子醬最鍾意去邊，佢會答「我鍾意郊遊，鍾意草地同沙灘」有時都幾感觸，沒有白費這幾年時間

如果只係從書本上學到 春天就綠葉鮮花處處，秋天轉黃，遍地落葉，倒不如走進大自然，魚子醬見下圖的樹葉都問「點解全部都唔同色ge！？」其實今年無秋天都無冬天，抽濕機都無收埋過，紅葉期真係遲左d，樹木應該都要好煩惱呢種天氣應該怎辦 

屯門徑近若夢園一帶，比較陰涼，也有彩虹般的圍欄，靚靚地，好有動力走下去 

又係另一個晨運吹水地，頭先有呼拉圈ge會唔會係女士聚集，呢度就男士呢，哈哈 

除左大棠、青衣、嘉道理，其實九徑山沿途都見到好多紅葉 

經過若夢園段的長命樓梯[魚子醬中途坐左幾次小休] 在屯門獅子亭大休後，因為時間所限我地只預備了豬柳強，有點乾無乜胃口，幸好同來休息的行山人士轉贈新鮮的棗，一下子補充了水份和醣份，邊走邊吃，醒神得多，山上總是人間有情

愈靠近虎地，愈見貧瘠，但風景愈見開揚 

但呢一段ge屯門徑新新鋪設，超級好行又靚仔，辛苦晒所有工人叔叔 

在接近屯門徑終點時，就遠眺到藍地水塘在眼前，到拐最後一個彎見到虎地字眼時，太開心了~魚子醬又憑自已完成了 少少麥徑10+整條屯門徑，大約3-4km路，用了1hr 50m，一下都無扭抱過 [如果大人行應該1hr就ok~不過有小朋友就會多大約1倍時間，歇息同影相多]

由屯門徑出口燒烤場 [車可到] 大約向深處走多10min就可以到藍地水塘，3/4路段是闊大車路，經過兩個電塔後，就會見到有樓梯落，因為都幾斜的關係，安全第一，照片只此一張

落到黎又係有一種 無悔 的心情，每一次落樓梯都覺得大鑊啦一陣要反方向行返上去，但往往結果都會有意外收穫

單靠相片同筆墨都難以形容，雖然水塘小小的，但一山一水的美景其實就在大家身邊，好肯定就算住係附近ge人都未必知自已後山有個咁靚ge地方，嘆為觀止 

見到靚景係咪個人會跳制ga呢？媽媽不停思覺失調咁「好靚好靚好靚好靚」魚子醬無端端係度做早操 XD

大家在欣賞美景之餘，也要注意安全，特別有小孩同行的，雖有欄杆，但小朋友興奮用杆借力的話，都真係話跌就跌，小心啊，山中又唔多遊人

忍唔住影完又影，最近就算早上至中午好好天，一到3,4點都會開始多雲，但這一天一直到日落都藍天伴我行，難得難得

由水塘步回燒烤場，沾沾人氣，跟行山友寒喧幾句，又各自踏上旅途。魚子醬曾提議由屯門徑步回家，魚子媽心想「你呀......行行下係樓梯訓著都似」 最後都係沿虎地上村的車路向下走，在嶺南大學及配水庫路口步出

落山會有公廁，大家有需要可以方便方便 

我們就在這路口步出，如果純想看水塘的話，是輕鬆的，可以直接搭西鐵/67m/67x等步行到嶺南大學側，一直走上山就到達，約30min 

回程巴士站為彩暉花園巴士站，太陽還未落山~yeahhh~2015年的平安夜節目認真豐富，回家沖涼，叫外賣，訓覺~yeahhhh XXD