【夜行香港】龍尾灘的夜行生態。人生最寶貴的一課 【鐵人活動】

魚子媽算是一個well-planned 的人，大部份時間都好怕adhoc，即係下晝打黎「今晚一齊食飯呀~」我一定會say no~因為每日早午晚有乜要做都已經計劃好晒；點知，史上有一個活動就打破了呢個記錄，因為佢完全唔影響我要做的事，只是佔用了我一晚睡覺時間 @@ 一個通宵達旦的活動，朋友C 傳來一句 ""夜行龍尾~有無興趣??"" 看看日曆 「26號野餐~聖誕Party~~27號小礦工」26號晚就這樣一去不返~咁激動？但最終我都二話不說答應了，真心瘋狂

就係咁，魚子媽 boxing day當晚跟朋友食飯後，到友人家人借sofa攤到2330，就出發往大埔墟火車站集合，時間為0030，好激動；在火車站已關門的starbucks集合，人人都倦意十足，伏在桌上，靠在梳化椅上，但一起行，大家都立馬腎上腺素急升，醒神晒！是晚的目的地，是早前哄動一時的龍尾灘 

魚子媽很少往這邊走，因為weekend總是人山人海，所以這邊的地理知識很貧乏，原來龍尾灘就在大馬路旁邊，wow~!仲以為極據生態價值的地方一定在偏僻人少之地，由龍尾一直向前走，已經是大美督 

莫講夜晚，就算日頭自已來到這石灘，相信我們也會無甚收穫，這晚有生態迷 Ray，也有從事這方面教育的 Dickson為大家講解，真心上了重要而寶貴的一課。

龍尾灘易於到達，但真心覺得這裡不宜帶6歲以下的小朋友前來，石多可能不是問題，石上更多蠔殼就是極大問題，跟海下灣一樣，物種愈豐富的地方，就愈危險，魚子媽受過深深的「切膚」之痛，永世難忘；所以今日死都唔會離棄對水鞋，記住記住記住，一定一定一定，黎呢度要著水上運動鞋 / 水鞋~就算無~白飯魚都好~~Crocs 好過無 

為何偏要選擇2015 boxing day來呢？其實這天是大退潮的日子，所以相當適合做考察，而入夜後海洋生物ge生理時鐘都要訓覺ga嘛~所以行動都會比較慢，日間可以竄走了的魚，依家都有機會捉得住。同時又有機會欣賞到夜行生物的習性，不過講多一萬句都要講，請尊重生命，只觀察，不玩弄，不帶走；以往看螢火蟲必需用紅燈，但海洋生物就沒這必要，強白光電筒已可，潛水電筒更好，有埋防水Macro相機就超好 

踏在泥灘上頭一小時，其實唔係好知自已做緊乜，每次Ray大叫有發現，心裡都在想「嘩你咁都睇到...真係要比個叻你」係我地眼中，只係得閒有d魚蟹路過，所以起初拍的照片都好無目標、好失焦 。除左魚蝦蟹，今晚更感到奇妙ge係~海參[下圖] 海星、海葵、海龍、海馬、海膽、海牛都看到，連珊瑚都有！

Ray從家中扛來一個花盤、一個魚缸~真係辛苦晒，為的是讓我們更清楚分辨到物種的多樣性，而每次大家相機飽晒後，都會將牠們放回原位，記住一定要原位 

掌握到泥灘考觀的節奏後，魚子媽也多了時間自行發掘，原來海參真係好鍾意痴住d石，R痕？然而佢地可以任意伸長縮短，彈性極高，受驚時會吐出內臟給敵人，然後趁機逃走再重新長出內臟

在泥灘上，我們外行人未必可以分到魚的種類，但偶爾也可細心觀察到有趣的活動，例如這隻蝦在掘窿，不停運出沙石

這個晚上在海中我們遇上了超多不同的魚，有平時街市見到的，又有些走可愛路線的，火點、指腳沙鰍、雞泡、蝦虎魚、沙鑽、梳蘿魚等等

好戲在後頭 

謝謝Ray n Dickson這晚不停為我們帶來好消息，海龍終於出現了，其實普通人如果企係度望，就只係好似枝樹枝，但其實佢ge頭部同海馬一樣都係嘟咀架，大家有機會到水清沙幼而物種豐富的地方，都不妨留意一下 

嘩!!!!!!竟然~竟然可以係自已腳邊見到海馬，真係好神奇！原來發現佢地都要有竅門架~~就係佢地好鍾意用尾巴勾住d繩、枝等等 

海星海膽水母都係沙灘見過，但海馬對於大家黎講，可能真係去海馬公園先會見到，絕對係今日ge BONUS 呀！ 嘩如果真係可以同魚子醬講「媽咪今日同你睇海馬」而真係遇到ge話，一定超級勁爆開心

雞泡魚話漲就漲，話縮就縮，也是第一次在自然環境遇上 

大退潮的好處是，大家可以走到離岸很遠的地方，遍地海星不是夢，而且我們也遇上了綠海膽與長刺海膽； 

旁邊傳來一句「珊瑚啊~!」well well well? 雖然同大堡礁個種幻想似乎好大出入 XD 但佢真係珊瑚ge一種 

給大家送上超大海參一條，真係愈碌愈長 XD 

0030集合，一直逗留到六點，仍然未天光，但漲潮了不少，我們也是時候離開；其實沒有想像中辛苦和眼訓，因為整晚都有新發現，可惜厚雲得一粒星也看不見

大伙兒沿沙灘走到大美督公廁梳洗一下，就齊齊搭小巴回火車站，真心喜歡這種寧靜的旅程，大家同聲同氣，希望未來有機會再一齊出動！如果真係想帶小朋友黎ge，就做足安全措施，包趾鞋是必備，手套也推介，同時帶定防蚊防曬同急救物品! 留意天文台apps 就可知道每日潮汐時間，以1米下為佳。因為海岸生物大多都有保護色，所以細心留意沙泥面、石隙，可以小心反起石底，但看完後記緊反回，因為上下兩面都是不同生物的家啊~

尊重自己，尊重大自然

魚子媽分享此文並非想宣傳大家快快去龍尾搞旺個場，而係一個物種如此豐富 [超過300種] 的地方，政府的環評報告離譜得指出只有十種八種，真係貝殼都唔止啦下話，此處絕對不適宜作人工沙灘的地點。此文希望喚起大家的注意，如果你們也是愛大自然的人，絕對可以跟小朋友來課自然生態教育課，認真