鐵人家族的生活原則

=================================
鐵人家族的生活,就是在藍天白雲的時候「及時行樂」,
讓大自然成為孩子的導師所以天晴的時間,文章更新速度會慢慢慢慢慢慢慢,因為我們都往外跑了!下雨天就是博客更新得最頻密的日子
我們的文章都是有血有汗的真實分享,請尊重版權,要轉載請標明出處,謝謝。
=================================

1/17/2013

替小孩贏在起跑線上 ? 對唔住,我覺得係呢個世界痴左線

唔知幾時開始,生仔一定要請陪月;唔知幾時開始,小朋友的上學年齡推前到2歲返Nursery,甚至6個月就要上Playgroup[唔係反對,但小朋友無返請不要歧視];唔知幾時開始,連補習都要由幼稚園開始;唯一可以解釋的是,呢個世界真係痴左線。

現在看著這文章的人,回想一下自已四歲時玩緊咩做緊咩,可能你好自豪咁話已經幫緊手湊細佬妹,又或者無憂無慮過緊童年;2x年前的我,四歲應該已經學習芭蕾舞,其後幾年中國舞、爵士舞、武術、詠春、跆拳、畫畫、鋼琴、無數課外活動緊接而來[你講得出ge我都應該學過,我妹連紮獅頭都學過,你話呢],但媽咪的理念係想我周身刀[雖然唔係張張利],同埋從中揀自已真係鍾意學ge野繼續學;

小朋友在幼稚園學習的不應是書本的理論知識,幾個簡單的英文生字、分辨形狀顏色、連線、學習職業生果動物等,但現在的父母高薪厚職了,知識水平了,反而教育小朋友的心態也理想化,個個都想自已仔女做醫生會計師律師,竟然3,4歲就開始補習...

以下的對話摘錄自《與童同行》

放學時間,地鐵車廂內,一對中學生男女,正討論着應否趁課餘補習賺外快。

男:「辛唔辛苦?一星期要補幾日?」
女:「都要三日,每日一個鐘。」
男:「你兼顧得到嗎?」
女:「都應該可以卦,我老豆叫我可以試試,如果覺得太辛苦,就唔好做。」
男:「一星期要補三日咁多,你個學生幾多年班?」
女:「K2。」
男:「咩話!幼稚園K2?」
女:「好出奇咩!我之前試過幫一個三歲八個月的男生補習啦!」
男:「三歲八個月,有咩補呀?」
女:「你唔好以為三歲八個月咩都唔識,佢識串dinosaur呀!」
男:「恐龍,我都唔識串……」
女:「我唯一擔心,係唔識幫佢哋做勞作,所以都係要諗清楚先……」


==========================================
直升機父母,總想未雨綢繆,而且是極度過份地未雨綢繆,不少心儀名校的家長分分鐘計劃生B前已經plan好所有聯絡,與校長打好關係,搬屋入校網繼而混入闊太生活,再安排無限量的Phonics class,鋼琴已經是無用的必修科,要學就學豎琴,
補習~!?梗係要搵個最好,仲要記住千祈唔好比佢學左屋企姐姐d菲律賓印尼口音!

識得我耐ge人都知我的性格,要不然我今天不會坐在這裡做FTM打Blog,我自豪ge係,由細到大媽咪都比好大自由度我,我有一個忙碌的童年,但同時每逢暑假參加社區中心活動做義工,全香港可以參觀ge野我都應該參觀過~全香港可以玩ge地方我都玩過晒,會考後雖然曾施壓叫我返大陸讀大學,但最後我選擇繼續向Bio的路走上去,無端端就讀左6年Applied Bio,無端端就大學畢業,無端端又鍾意周圍去旅行,總之無端端就會唔係香港;然後無端端就決定結婚,再無端端出左本書,跟手無端端就痾左個仔出黎;我是年輕FTM,但我見識不比別人少,我也不與社會脫節,因為我相信樂天改變命運;我到依家都好想讀多個Master,只係唔知幾時會無端端讀,想做就做,就是我

補習? 補習是比原本已經考第一ge人補,死都要奪A個d;但明明本身奪A ge人好多都唔洗補習;小朋友的爸爸媽媽,請仔細想想為甚麼要幫3,4歲的小朋友補習,是為了排山倒海、如臨大敵的小一入學試? 還是要增長知識? 「贏在起跑線上」是本世紀我最討厭的一句說話,人有高矮肥瘦,腦袋的神經網絡早就鋪好,後天的努力幫不了很多,Tip題唔係萬能ga!

你試下係Google  search 幼稚園補習老師,不難找到一份寫明要5年或以上幼稚園老師經驗, CE/QKT 資歷.每星期五次, 約2-3 小時

你話啦~呢個世界係咪痴左線~?!

1 則留言:

幼稚園生與全職媽媽。上山下海的鐵人家族玩樂指南。堅持「以大自然為師」的教育理念,希望認識到更多志同道合的家庭!發掘更多親子好去處。親子專頁: http://www.facebook.com/xavi.hk


品牌。傳媒合作
歡迎隨時聯絡
Email: megan_wong@ymail.com

Related Posts Plugin for WordPress, Blogger...