【親子活動】魚子醬玩樂手記 - We嘩充氣嘉年華「小小建築師」主題樂園 盡在愉景新城

近年真係多左好多親子活動有充氣設施，就好似上兩星期魚子醬去的親子農莊也有大量充氣設施，幾十蚊已經全日任玩，不過遠在博覽館，對市區的家庭來說吸引度更低，所以人流不算很多；今次We嘩!充氣嘉年華落戶愉景新城，這裡可以同時提供到一步之隔的戶外及室內地方，又用小小建築師這新主題，超吸引！

到場後唔洗心急，無論係買左Yahoo團購定walkin，都先搵賣飛ge小屋仔，個度會有明確指示，同時列出所有設施需要的遊戲券數量和高度限制；大部份遊戲都係90cm-140cm，除了部份for baby又或者大人玩的，可以到時詳細計劃一下

今次最矚目的是這個9米高ge 小小工程師 [$50/4min][90-140cm]

主辦單位照顧周到，有提示小朋友最好著長袖衫褲，怕滑落時熱力磨擦到損左，不過魚子媽覺得最貼心的係，每位入場的小朋友都有護踭一對，全新的，而且，係送比你架！超正~自已出去玩都可以用

這個家長影到的不多，小朋友都在中間的樓梯爬上去，然後左右兩邊的「運輸帶」斜道瀡落黎。想拍到更精彩ge相，爸媽其中一位可以上一層，在超近距離ge正面角度任影唔嬲 XD

回到廣場，今次最熱烘烘的果然是首次登場的挖泥機，由早上11點開幕就已經要排2,3轉以上，相信weekend要排更耐，6部挖泥機都係由真正生產工程車ge車廠製造，唔係玩具黎架

爆谷、棉花糖、烤魷魚，所有邪惡的零食都在這裡找到，價錢合理

  

因為今天只開了4部車車的關係，我們也等了2,3轉，不過大部份小朋友都期待著，所以秩序良好，又有冷氣，時間不難捱，同樣是$50/4min [90-140cm]

好喜歡這種有不同色調的波波池，並列之下更有氣勢，雖然魚子醬擺明唔想聽指示亂玩，但哥哥都好細心提示要去邊度挖起波波放入籃

可能魚子媽這些方向白痴坐上去玩，都會控制不來 XD 反而小朋友的領悟能力好高，學野好快，見個個都玩得有板有眼，魚子醬仲連個籃都撈得起，「服」！

之後有「親親乳牛」環節 [$20/2min][90-140cm] 呢個其實唔限高度都ok ar我覺得，不過可能都要3歲以上先夠力搾牛奶就真，而且一路搾牛奶，牛牛仲會發聲架~哈哈

魚子醬正處於學習站著扶住 _ _ 救火救到出晒界ge階段 [男孩的家長會明白XD] 結果一邊搾牛奶問「媽咪牛牛有四個 _ _ ge？」呀......呢個係唧奶奶，唔係痾尿ok? [已經笑到唔想答佢]  btw其實唧出黎個d應該係水黎ge~但個桶滿滿的隔層又營造到奶泡的效果，仿真度好高

充氣設施玩得多，依家ge小朋友應該要認識下中國傳統的智慧，用搭棚的技巧，製作出一個完美的遊樂場[$30/4min][90-140cm]，有兩邊樓梯上、有滑梯、仲有2個大韆鞦，但上半天ge人流不多，在這裡的哥哥姐姐都「嗚~~~個大滑梯遮住晒我地~~~無人黎好悶」其實我覺得遮住都唔係主因，係有d家長會覺得黎充氣嘉年華玩彈床、玩挖泥機先無蝕，其實大家應該要珍惜這些傳統手藝

今次每個遊戲ge工作人員哥哥姐姐都照愛錫小朋友，陪住上，陪住跑，一踢又扶返佢，玩滑梯又想傍到實，反而魚子媽站在遠一遠「哥哥唔緊要架，由佢啦」「姐姐得架啦，依家d小朋友係咁，跌都由佢啦」

不過總有d怪獸家長，會叫埋菲傭姐姐跟貼小朋友，見到魚子醬係上面跑又大嗌「嘩無人睇住ge~咁危險都得架!你地d職員睇緊d啦好無」~~~唔...訓練EQ~唔出聲~算~~~~

這種甚有playright style 的遊戲先適合鐵人家族的目標，簡單的棚架，鋪兩幅Banner，又係一個精彩到極的遊戲

麻包袋包兩包，又變成舒適的凳，這個韆鞦是玩過最深刻的一個啊~超有特色

地質公園$40/4min [>90cm] 呢個超推介啊，好似上緊地理堂咁，盆內的不是Kinetic Sand，是真的沙石，小朋友用沙灘玩具挖挖挖，頭頂的Projector會自動識別到不同高度而投射出實時的影像，由山峰到湖泊都有，超真實！

說話唔洗多，去片！

魚子媽就製造了兩個湖同一個高山出來! yeah~真係好有地質公園feel ar~~~

「反斗挖掘樂園」$30/4min [90-120cm] 雖然只係簡單ge彈床，但家長可以透過三邊的網窗清楚睇到小朋友，影相都易d~~不過地方不大，若然有大有細ge小朋友係入面，都有少少危險

「小森林大歷險」$30/4min [90-120cm] 呢個ge設計比較卡通化，都易於爬行，大d ge小朋友可能會覺得悶，離不開跳跳彈彈爬上爬落瀡下滑梯。家長ge視野有限 [可能魚子媽矮啦下]

攤位遊戲都係$10有三次機會，一個是木桶過三關，扔公仔入晒木桶就有獎 ^o^ 而另一個就係用射鴨仔，好考眼界但又好好玩 XD 玩落仲會覺得得3下好唔夠喉~~~

場內唯一一個只接受大朋友玩ge係 大力搥，要140cm以上先玩得~$20有三次機會

每次都覺得Kinetic Sand係最抵玩~因為 $30就可以玩6分鐘，而且家長起碼有得坐下~haha~隔黎ge手工都係休息好機會，因為整一個可能需要20-30min [不同款式 $20-80]

造型流沙每次ge檯凳都唔同，今次呢張八爪魚凳真係幾ok 呀!! 等我地整個金字塔先~~! yeah

主區內唯一一個不是用遊戲券的遊戲是體感夾禮物機，需要在愉景新城場內消費滿$100，夾禮物ge過程先要同螢幕Hi Five~然後控制前後左右，然後出示 V字手勢，就會落夾啦~~~~

事實證明~掛住玩前後左右，根本就無好好睇準個位 XD 夾左2次都夾唔到~~得安慰獎 Gerber BB餅 coupon~~哈哈~都有問過下姐姐入面其實係d咩獎，不過姐姐一律封口只答「都係d coupon 咁啦~~」

小小小朋友的家長不用擔心，今次唯一可以比80-110cm玩ge越野天地 [$30/4min] 人流極少，可能因為不在廣場那邊，而是Striderite / bebedream 門口，咁樣小朋友就玩得更放心，欄位較低，家長可以全程望實小朋友動向，今次活動所有Helper都真係好照顧小朋友

呢個小遊戲區得2個遊戲，除左小小朋友ge彈床遊戲，仲有魚子醬ge最愛 抓抓樂~! 好多小朋友都一開機就驚到要出黎啦~~不過魚子醬玩完仲想再玩~因為佢話「裡面好大風好舒服」

每個遊戲出入口都有AQ消毒噴噴，魚子醬今日對手應該噴左幾十次，不過部機係噴霧而不是jelly狀，放係檯面比小朋友去噴，仲會連續噴2,3次，見好多小朋友噴完一次收手，唔為意就被噴臉，魚子醬都是中招者，主辦單位可以考慮放係凳~安全緊要過賣廣告

由11點玩到3點幾，媽媽快虛脫，魚子醬依然Hyper Mode，真係要走了~係樓上望落去~一樣咁靚~不過愈晏就愈多人排隊，3點幾ge時候已經排到轉左彎~~如果想快排快玩~真係要早dd去

而魚子醬好期待ge船仔[$50/4min][90-130cm]同親子水上飄滾桶[1-2人都是 $80/3min][>90cm]，因為天雨關係一直都無開啊~~~到我地返屋企先見到FB update 依家天氣OK開始有得玩啦~~~OH....唔緊要啦~充氣嘉年華開到8月16，大把時間黎玩啦，媽咪Promise一定會同你黎玩一次啦ok ?

相關文章:

魚子醬玩樂手記 - We嘩充氣嘉年華 2014 。玩盡九龍城廣場!

魚子醬玩樂手記 - 黃金海岸 Easter Dinoland 充氣嘉年華。盡興燒豬記!

愉景新城「小小建築師」主題樂園

日期 2015年7月24日(星期五)至8月16日(星期日)
時間 上午11時正至晚上7時正
地點 愉景新城 (荃灣地鐵站A3出口)

參考連結:

官方網頁: http://www.wewaland.com/news_detail.php?id=33

Facebook Page: https://www.facebook.com/WeWaLand

Yahoo團購優惠: https://hk.deals.yahoo.com/hong-kong/offer/265150