【親子好去處】善用生日免費優惠。昂坪360水晶車廂十個讚的旅程。腳軟未！

上回講到嘉道理農場擁有全港只有兩隻的騾仔，當年興建昂坪360的時候付出了不少血汗，應記一功；原來纜車已經通車九年，一直生怕勁多遊客，又怕要跟陌生人共處一室，結果今年才的起心肝，全因有魚子醬的玩樂原動力！在極晴朗的一天，過了愉快的一個下午

放學扔低書包，立馬出發，由屯門到東涌其實都只係30-40min車程，所以我們經常來這邊玩，如果你也是乘搭機場巴士的話，可以在東堤灣畔落車，向前行，橫過大馬路，沿著泳池直走就到；平日的下午，人流不多，總算鬆一口氣 

很容易讓人遺忘的是，其實昂坪360纜車，生日正日係免費架！若然生日撞正保養期，就可以該月份任何一日前來~yeah yeah yeah!! 九月幾乎有三星期在維修，所以我們拿拿臨趕係中秋長假前享受這港人福利，正日當日，我地已經去左海洋公園啦~hahahahahha 

標準車箱來回價格為 HKD165，而水晶車箱為 HKD255，若然生日又想試下坐水晶車箱點算？係可以架！只要補返HKD45一程，就可以升級至透明底的水晶車廂！見咁鬼抵，就豪拎90蚊出黎啦 XXD [事後覺得其實單程$45已經足夠，睇埋落去吧] 

是日天氣認真完美，魚子醬雖然也在海洋公園坐過纜車，但隨住年紀和懂事能力，這天興奮度爆燈，去程人流不多，每組客人都可以獨佔車廂，無論是輪椅或BB車都可以直接推入，唔洗收車，呢樣係最user-friendly的安排！ 

在纜車行駛期間，會經過不同的轉向站，魚子醬每次都問「到啦？到啦？到啦？」每次答案都係未到ge時候，其實又繼續興奮，莫說小孩，連第一次搭的魚子媽都想搭耐d啊，頭半程完全是瘋狂拍照時間，哈

將相片upload fb，很多朋友都話腳軟，但我地極享受，坐係地下多過坐係凳 [係好污糟，但此刻覺得唔坐唔得，無角度比坐係度更靚，最多之後用消毒噴噴] 

車廂無空調，因為座位兩邊都利用堅固的鐵網罩住，非常通風 [睇下魚子醬d頭髮就知]，即使盛夏都會涼快得很，可能冬天就慘豬d

經過幾個山頭，慢慢遠離東涌市，最深刻都係終於有機會親眼看到機場全貌，不停在研究飛機行的路線和次序，還看到我們當晚將會二訪的機場維修區；在維修區看完美日落的一文中都有提過，因為跑道會因應不同的風向而改變升降方向；我們這天在纜車就可以確切知道當日是起飛的！那就可以放心去拍照了 

爭議不斷的江珠澳大橋，原來已經建成一整條大蛇般的支柱，前幾次往大澳的航程中都覺得好傷心，周圍污煙瘴氣，由高空看下去，再一次覺得原本很純樸天然的海岸被污染 

所有主題樂園和景點都是這樣的浪費，待每一個乘客步出纜車，已經印好相關的產品直接放進手中，看兩眼就推卻了，其實真心覺得浪費，亦覺得被侵犯私隱。就好似n年前開始係東南亞等地旅行，每次上船落船、玩降傘、越野車等等，都會有專人拍攝然後貼落碟叫你買，每次都諗起呀媽個句「唔買你唔知人地會用黎做乜，落你降頭」 =.=  

經過商店步出市集，wow~! 超好天啊，而且市集也看來很熱鬧，為甚麼腦海總是那些商戶投訴冷清的新聞 

在出口旁邊有一個觀景台，可以遠觀大佛的壯麗 

魚子醬一家都無去過車公廟之類的地方，第一次遇上這些「一路好運」的轉轉，魚子醬認真地一路行一路轉，緊隨其後的媽媽一樣興奮，一齊轉！ 

魚子醬問了多次「搭完纜車有咩做」，自初中之後已經無黎過ge魚子媽只能講句「呀....食豆腐花呀我地！」找了又找，古色古香的Starbucks就有，那有豆腐花，苦惱的魚子醬尋遍不果  

在這裡幾個互動的自費項目我們當然沒有參與，不過齊集了旅遊景點影相位又幾開心，身後的正是許願樹，魚子醬就跟奧斯卡的獎座做朋友

這裡有一個非常低調的昂坪自然中心，冷冷清清，但兩母子就在裡邊玩了半小時 

既有專人介紹之外，也有不同的按鈕列出大嶼山的行山徑等等。我們就在繞了一圈慢慢研究大嶼山不同海灣的所在地，感謝姐姐細心的講解，連三歲小朋友也聽得入耳；下次一定要試試由東涌步入大澳

除了立體地型的展示，還有關於大嶼山的問答遊戲，未必識晒，但起碼可以在對答過程中學曉不少冷知識，也不錯 

 以前話比人知住屯門元朗，唔知點解總係有人會搶住問「馬路係咪有牛？」一d都唔好笑兼覺得無禮貌，屯門元朗市都已經發展得飽和，當然在鄉郊地方會遇見，但就算港九的鄉郊一樣會見到！ 而在大嶼山，牛牛絕對是原住民，我個在市集隨意也遇上一群在身邊過馬路

離開市集，慢慢步向大佛的方向，印象沒多少，但應該都真係會有豆腐花食掛 

天氣好，拍甚麼都美，這樣看起來大佛很有霸氣 

每個人小朋友時都會影過d咁ge相，魚子醬也趕及在三歲前影返幾張 XD 

鐵人家族的足跡又多了一個checkpoint，希望四年之內可以帶到你上鳳凰山睇日出，係山頂煮返個餐蛋麵，現階段還是過於危險 

前前後後都有幾檔食豆花的，個個都話自已手磨，信不信由你，不過咁ge天氣，食乜條氣都會順，所以就揀左最就近ge德記，遊客區，一黑一白，好似已經三十幾蚊，不過算啦，其實又真係幾好食；本來一心來尋找豆花的小朋友，吃了兩啖就搶走左碗芝麻糊食到底！ 睇黎下次再黎要改口話去大佛食芝麻糊 

店舖旁邊的草地又有一群牛食緊草，起初都有d驚，但係附近叔叔姨姨的鼓勵同示範後，魚子醬最後都同小牛做到朋友，有角個d就唔敢啦，哈哈！ 

其實呢一種帶點穿梭市郊市郊，有補給又有靚景的半日遊，我們都很喜歡，昂坪市集沒有預期中商業化，單看建築也是不錯的拍攝背景，洗手間尚算整潔，食肆價錢比想像中化算，可以有下次！ 不過應該係下年生日~hahahahaha；因為纜車收6pm的關係，4,5點都已經係回程的peak hour，需要同遊客齊齊坐一個車廂，令原本超有趣的水晶車廂，變得冷冷冰冰又尷尬，所以如果再坐，只補$45坐去程水晶就夠了！ 未來魚子醬會繼續帶大家，平靚正玩盡香港十八區，遇著合心水的活動，就開event同大家一齊玩，如果你都拒絕港孩，希望小朋友有快樂童年的話，就緊貼我們的Facebook動向吧 ^o^

相關文章:

【親子好去處】完美的日落勝地 - 機場維修區。飛機就在頭頂經過！！